dil na mana aql ne ye baat samjhai bahut

dil na maanā aql ne ye baat samjhā.ī bahut

ishq meñ har gaam pe hotī hai rusvā.ī bahut

shohratoñ ke vāste hai bazm-ārā.ī bahut

mahfileñ raas aa.iiñ tum ko ham ko tanhā.ī bahut

is ġhalat-fahmī meñ maiñ ne kho diyā apnā vaqār

us ne kī thī ek din merī pazīrā.ī bahut

kuchh hasīñ yādoñ ke manzar shaam se āñkhoñ meñ the

shab ko mere paas niiñd aa.ī to pachhtā.ī bahut

aisī bastī meñ miyāñ amn-o-amāñ kā kyā savāl

sulh-jū kam hoñ jahāñ par aur balvā.ī bahut

go ba-zāhir haath us ke ḳhūn-ālūda nahīñ

nafratoñ kī aag lekin us ne bhaḌkā.ī bahut

bik rahe haiñ āj-kal be-bhāv logoñ ke zamīr

log kyoñ kahte haiñ duniyā meñ hai mahñgā.ī bahut

ehtisāb-e-zīst karne ke liye baiThā thā maiñ

yaad aa.ī dostoñ kī kār-farmā.ī bahut

zindagī bhar maiñ rahā huuñ rahrav-e-rāh-e-vafā

in vafāoñ kī magar maiñ ne sazā paa.ī bahut

pasta-qad koshāñ haiñ merā qad ghaTāne ke liye

par mujhe allāh ne baḳhshī hai ūñchā.ī bahut

tālib-e-shohrat nahīñ 'bebāk' maiñ ye soch kar

ek do kā zikr kyā us ke haiñ shaidā.ī bahut

dil na mana aql ne ye baat samjhai bahut

ishq mein har gam pe hoti hai ruswai bahut

shohraton ke waste hai bazm-arai bahut

mahfilen ras aain tum ko hum ko tanhai bahut

is ghalat-fahmi mein main ne kho diya apna waqar

us ne ki thi ek din meri pazirai bahut

kuchh hasin yaadon ke manzar sham se aankhon mein the

shab ko mere pas nind aai to pachhtai bahut

aisi basti mein miyan amn-o-aman ka kya sawal

sulh-ju kam hon jahan par aur balwai bahut

go ba-zahir hath us ke KHun-aluda nahin

nafraton ki aag lekin us ne bhaDkai bahut

bik rahe hain aaj-kal be-bhaw logon ke zamir

log kyon kahte hain duniya mein hai mahngai bahut

ehtisab-e-zist karne ke liye baiTha tha main

yaad aai doston ki kar-farmai bahut

zindagi bhar main raha hun rahraw-e-rah-e-wafa

in wafaon ki magar main ne saza pai bahut

pasta-qad koshan hain mera qad ghaTane ke liye

par mujhe allah ne baKHshi hai unchai bahut

talib-e-shohrat nahin 'bebak' main ye soch kar

ek do ka zikr kya us ke hain shaidai bahut