dil ne fareb ishq mein khae kahan kahan

dil ne fareb ishq meñ khaa.e kahāñ kahāñ

darmāndagī meñ ashk bahā.e kahāñ kahāñ

sajde kahāñ kahāñ na kiye rāh-e-shauq meñ

ka.abe qadam qadam pe basā.e kahāñ kahāñ

bazm-e-bahār-e-kunj-e-haram sehn-e-mai-kada

dīvāngī ne hashr uThā.e kahāñ kahāñ

har manzar-e-bahār meñ terā jamāl hai

vahshat sar-e-niyāz jhukā.e kahāñ kahāñ

āġhāz-e-ġham urūj-e-junūñ intihā-e-shauq

vo zindagī meñ yaad na aa.e kahāñ kahāñ

'maz.har' shab-e-firāq kī zulmat na dhul sakī

ham ne charāġh-e-dāġh jalā.e kahāñ kahāñ

dil ne fareb ishq mein khae kahan kahan

darmandagi mein ashk bahae kahan kahan

sajde kahan kahan na kiye rah-e-shauq mein

kabe qadam qadam pe basae kahan kahan

bazm-e-bahaar-e-kunj-e-haram sehn-e-mai-kada

diwangi ne hashr uThae kahan kahan

har manzar-e-bahaar mein tera jamal hai

wahshat sar-e-niyaz jhukae kahan kahan

aaghaz-e-gham uruj-e-junun intiha-e-shauq

wo zindagi mein yaad na aae kahan kahan

'mazhar' shab-e-firaq ki zulmat na dhul saki

hum ne charagh-e-dagh jalae kahan kahan