dil ne yun hausla-e-nala-o-fariyaad kiya

dil ne yuuñ hausla-e-nāla-o-fariyād kiyā

maiñ ye samjhā shab-e-ġham tum ne kuchh irshād kiyā

jabr-e-fitrat ne ye achchhā karam ījād kiyā

ki mujhe vus.at-e-zanjīr tak āzād kiyā

tum na the dil meñ to vīrāñ thī kahānī merī

ishq ne lafz ko mafhūm se ābād kiyā

terā andāz-e-tabassum hai ki unvān-e-bahār

jab koī phuul khilā maiñ ne tujhe yaad kiyā

jhilmilāne lagī lau sham.a kī gul murjhā.e

ham ne jab bazm meñ zikr-e-dil-e-nāshād kiyā

intihā-e-ġham-e-furqat meñ vo din bhī aa.e

maiñ tujhe bhuul gayā tū ne mujhe yaad kiyā

imtiyāz-e-karam-o-jaur se mahrūm haiñ sab

tū ne jis dil ko miTāyā use ābād kiyā

thā asīrī meñ hameñ sirf gulistāñ kā ḳhayāl

chhūT kar aa.e to zindāñ ko bahut yaad aayā

kaun samjhegā mirā ālam-e-rindī 'shāhid'

jab kahīñ jī na lagā mai-kada ābād kiyā

dil ne yun hausla-e-nala-o-fariyaad kiya

main ye samjha shab-e-gham tum ne kuchh irshad kiya

jabr-e-fitrat ne ye achchha karam ijad kiya

ki mujhe wusat-e-zanjir tak aazad kiya

tum na the dil mein to viran thi kahani meri

ishq ne lafz ko mafhum se aabaad kiya

tera andaz-e-tabassum hai ki unwan-e-bahaar

jab koi phul khila main ne tujhe yaad kiya

jhilmilane lagi lau shama ki gul murjhae

hum ne jab bazm mein zikr-e-dil-e-nashad kiya

intiha-e-gham-e-furqat mein wo din bhi aae

main tujhe bhul gaya tu ne mujhe yaad kiya

imtiyaz-e-karam-o-jaur se mahrum hain sab

tu ne jis dil ko miTaya use aabaad kiya

tha asiri mein hamein sirf gulistan ka KHayal

chhuT kar aae to zindan ko bahut yaad aaya

kaun samjhega mera aalam-e-rindi 'shahid'

jab kahin ji na laga mai-kada aabaad kiya