dil-o-dimagh mein baham thin qurbaten kya kya

dil-o-dimāġh meñ bāham thiiñ qurbateñ kyā kyā

use bhulā ke bhī yaad aa.eñ sohbateñ kyā kyā

safar tamām havā de ke dāġh-e-ham-safarī

ḳhayāl-o-ḳhvāb huī haiñ rifāqateñ kyā kyā

Thahar Thahar ke bujhā āḳhirash sharāra-e-dil

dhuāñ dhuāñ huiiñ ghuT ghuT ke hasrateñ kyā kyā

vo ham se chhin bhī gayā jaañ se ham ga.e bhī nahīñ

vafā ne aaj dilā.ī haiñ ġhairateñ kyā kyā

abhī to 'uzr-e-mulāqāt hī tak aa.e haiñ

abhī to dekhiye hoñgī qabāhateñ kyā kyā

vo 'bazm' jo dil-o-jāñ se 'azīz thā ham ko

usī 'azīz ne dī haiñ aziyyateñ kyā kyā

dil-o-dimagh mein baham thin qurbaten kya kya

use bhula ke bhi yaad aaen sohbaten kya kya

safar tamam hawa de ke dagh-e-ham-safari

KHayal-o-KHwab hui hain rifaqaten kya kya

Thahar Thahar ke bujha aaKHirash sharara-e-dil

dhuan dhuan huin ghuT ghuT ke hasraten kya kya

wo hum se chhin bhi gaya jaan se hum gae bhi nahin

wafa ne aaj dilai hain ghairaten kya kya

abhi to 'uzr-e-mulaqat hi tak aae hain

abhi to dekhiye hongi qabahaten kya kya

wo 'bazm' jo dil-o-jaan se 'aziz tha hum ko

usi 'aziz ne di hain aziyyaten kya kya