دل و دماغ میں باہم تھیں قربتیں کیا کیا

دل و دماغ میں باہم تھیں قربتیں کیا کیا

اسے بھلا کے بھی یاد آئیں صحبتیں کیا کیا

سفر تمام ہوا دے کے داغ ہم سفری

خیال و خواب ہوئی ہیں رفاقتیں کیا کیا

ٹھہر ٹھہر کے بجھا آخرش شرارۂ دل

دھواں دھواں ہوئیں گھٹ گھٹ کے حسرتیں کیا کیا

وہ ہم سے چھن بھی گیا جاں سے ہم گئے بھی نہیں

وفا نے آج دلائی ہیں غیرتیں کیا کیا

ابھی تو عذر ملاقات ہی تک آئے ہیں

ابھی تو دیکھیے ہوں گی قباحتیں کیا کیا

وہ بزمؔ جو دل و جاں سے عزیز تھا ہم کو

اسی عزیز نے دی ہیں اذیتیں کیا کیا