دل و دماغ پہ ایسے وہ چھائے جاتے ہیں

دل و دماغ پہ ایسے وہ چھائے جاتے ہیں

کہ ہم بھی خواب میں دنیا بسائے جاتے ہیں

عداوتوں سے بھری ہے یہ خوبرو دنیا

سو ہم چراغ محبت جلائے جاتے ہیں

چلے چلو نہ بلاوے کا انتظار کرو

کہ ان کی دید کو سب بن بلائے جاتے ہیں

ہمارے عشق سے جن کو ملی یہاں شہرت

غضب ہے آج ہمیں کو بھلائے جاتے ہیں

ابھی تو روئے سخن بھی ہوا نہ میری طرف

ابھی سے آپ تصور میں آئے جاتے ہیں

نظر انہیں کے لیے تھی جگر انہیں کے لیے

وہی جو آج نظر بھی چرائے جاتے ہیں

صلہ ملے نہ ملے جستجو یہ کس کو ہے

کہ ہم تو اپنی طرف سے نبھائے جاتے ہیں