dil-o-dimagh pe aise wo chhae jate hain

dil-o-dimāġh pe aise vo chhā.e jaate haiñ

ki ham bhī ḳhvāb meñ duniyā basā.e jaate haiñ

‘adāvatoñ se bharī hai ye ḳhūb-rū duniyā

so ham charāġh-e-mohabbat jalā.e jaate haiñ

chale chalo na bulāve kā intizār karo

ki un kī diid ko sab bin-bulā.e jaate haiñ

hamāre 'ishq se jin ko milī yahāñ shohrat

ġhazab hai aaj hamīñ ko bhulā.e jaate haiñ

abhī to rū-e-suḳhan bhī huā na merī taraf

abhī se aap tasavvur meñ aa.e jaate haiñ

nazar unhīñ ke liye thī jigar unhīñ ke liye

vahī jo aaj nazar bhī churā.e jaate haiñ

sila mile na mile justujū ye kis ko hai

ki ham to apnī taraf se nibhā.e jaate haiñ

dil-o-dimagh pe aise wo chhae jate hain

ki hum bhi KHwab mein duniya basae jate hain

‘adawaton se bhari hai ye KHub-ru duniya

so hum charagh-e-mohabbat jalae jate hain

chale chalo na bulawe ka intizar karo

ki un ki did ko sab bin-bulae jate hain

hamare 'ishq se jin ko mili yahan shohrat

ghazab hai aaj hamin ko bhulae jate hain

abhi to ru-e-suKHan bhi hua na meri taraf

abhi se aap tasawwur mein aae jate hain

nazar unhin ke liye thi jigar unhin ke liye

wahi jo aaj nazar bhi churae jate hain

sila mile na mile justuju ye kis ko hai

ki hum to apni taraf se nibhae jate hain