dil-o-nigah ko kab in ka mustaqar jaana

dil-o-nigāh ko kab in kā mustaqar jaanā

ḳhayāl-o-ḳhvāb ko ik arsa-e-safar jaanā

tumhāre ḳhvāb pas-andāz kar liye ham ne

aur apne aap ko phir kitnā mo'atabar jaanā

ye kārvāñ to na jaane kahāñ talak jaa.e

tumheñ jahāñ kahīñ manzil mile Thahar jaanā

guhar sadaf meñ na rahtā to phir kahāñ rahtā

us ek qatre ko kis ne azīz-tar jaanā

sarisht hai yahī us kī bachā.egā dāman

agar vo baat badal de to zabt kar jaanā

samajh to lene do in nafratoñ kā koī javāz

phir is ke baad mire dil se bhī utar jaanā

jo kuchh kahā use ahvāl-e-vāqa.ī samjhā

jo sachchā sher na samjhā use hunar jaanā

baḌā sukūn baḌī āfiyat milegī 'nasīm'

kisī kī bazm se uTTho to apne ghar jaanā

dil-o-nigah ko kab in ka mustaqar jaana

KHayal-o-KHwab ko ek arsa-e-safar jaana

tumhaare KHwab pas-andaz kar liye hum ne

aur apne aap ko phir kitna mo'atabar jaana

ye karwan to na jaane kahan talak jae

tumhein jahan kahin manzil mile Thahar jaana

guhar sadaf mein na rahta to phir kahan rahta

us ek qatre ko kis ne aziz-tar jaana

sarisht hai yahi us ki bachaega daman

agar wo baat badal de to zabt kar jaana

samajh to lene do in nafraton ka koi jawaz

phir is ke baad mere dil se bhi utar jaana

jo kuchh kaha use ahwal-e-waqai samjha

jo sachcha sher na samjha use hunar jaana

baDa sukun baDi aafiyat milegi 'nasim'

kisi ki bazm se uTTho to apne ghar jaana