dil-o-nigah pe jis ko ho iKHtiyar chale

dil-o-nigāh pe jis ko ho iḳhtiyār chale

rah-e-vafā meñ koī bhī na ḳhām-kār chale

hameñ ravish pe zamāne kī e'tibār nahīñ

hamāre saath zamāna hazār baar chale

ham apne vaqt ke aaqā ham apne daur ke shaah

magar ḳhudā na kare apnī pesh-e-yār chale

ye rahravān-e-mohabbat hī ḳhuub jānte haiñ

ki farsh-e-gul pe chale yā ba-nok-e-ḳhār chale

na rāhbar pe nazar aur na manziloñ kī ḳhabar

tire qadam-ba-qadam tere jāñ-nisār chale

hamāre ba.ad ke logoñ pe jaane kyā guzre

'ra.īs' ham to baḌe chain se guzār chale

dil-o-nigah pe jis ko ho iKHtiyar chale

rah-e-wafa mein koi bhi na KHam-kar chale

hamein rawish pe zamane ki e'tibar nahin

hamare sath zamana hazar bar chale

hum apne waqt ke aaqa hum apne daur ke shah

magar KHuda na kare apni pesh-e-yar chale

ye rahrawan-e-mohabbat hi KHub jaante hain

ki farsh-e-gul pe chale ya ba-nok-e-KHar chale

na rahbar pe nazar aur na manzilon ki KHabar

tere qadam-ba-qadam tere jaan-nisar chale

hamare baad ke logon pe jaane kya guzre

'rais' hum to baDe chain se guzar chale