دل پر اک نقش محبت کا ابھاریں تو سہی

دل پر اک نقش محبت کا ابھاریں تو سہی

زندگی اپنی سنور جائے سنواریں تو سہی

زیست اندھیروں سے نکل کر مہ کامل بن جائے

اس کی یادوں سے ذرا دل کو نکھاریں تو سہی

بے نیازی ہے جہاں لطف و کرم بھی ہیں وہاں

اس کو پیار اور محبت سے پکاریں تو سہی

اتنا مل جائے کہ دنیا کی ہوس مٹ جائے

اس کے آگے ذرا دامن کو پساریں تو سہی

دل کی آواز بھی آواز جرس لگتی ہے

جا کے ویرانے میں اک رات گزاریں تو سہی

موم کر دیتی ہے پتھر کو بھی میٹھی آواز

ہم انہیں پیار سے اک بار پکاریں تو سہی

چاند بادل میں چھپا ہے تو نکل آئے گا

رات کی چھاؤں میں وہ زلف سنواریں تو سہی

دیکھیں کیا فیصلہ کرتی ہے عدالت ان کی

آج اک پیار کی درخواست گزاریں تو سہی

ہو نہ ہو ان سے ملاقات مصورؔ لیکن

ان کی راہوں کو نگاہوں سے سنواریں تو سہی