dil par jo teri yaad ka pahra nahin hota

dil par jo tirī yaad kā pahrā nahīñ hotā

sāgar kī tarah zaḳhm bhī gahrā nahīñ hotā

ḳhvāboñ kā bahut dekhnā achchhā nahīñ hotā

har ḳhvāb yaqīnan kabhī sachchā nahīñ hotā

marzī hai mirī jis ko bhī chāhūñ use dekhūñ

āñkhoñ pe kisī zaat kā pahrā nahīñ hotā

lillāh tabīboñ ko dikhāte ho mujhe kyoñ

is TuuTe hue dil kā mudāvā nahīñ hotā

niklā hai kahāñ ret meñ tū pyaas bujhāne

sahrā meñ jo dikhtā hai vo dariyā nahīñ hotā

hoñToñ ko nujūmī ke jo siinā hai to sī do

taqdīr kā likkhā kabhī jhūTā nahīñ hotā

koī na agar chhīntā bachche kā nivālā

vo peT pakaḌ kar kabhī soyā nahīñ hotā

'svāmī' zarā sūraj ko samundar se nikālo

thak-hār ke yuuñ Dūbnā achchhā nahīñ hotā

dil par jo teri yaad ka pahra nahin hota

sagar ki tarah zaKHm bhi gahra nahin hota

KHwabon ka bahut dekhna achchha nahin hota

har KHwab yaqinan kabhi sachcha nahin hota

marzi hai meri jis ko bhi chahun use dekhun

aankhon pe kisi zat ka pahra nahin hota

lillah tabibon ko dikhate ho mujhe kyon

is TuTe hue dil ka mudawa nahin hota

nikla hai kahan ret mein tu pyas bujhane

sahra mein jo dikhta hai wo dariya nahin hota

honTon ko nujumi ke jo sina hai to si do

taqdir ka likkha kabhi jhuTa nahin hota

koi na agar chhinta bachche ka niwala

wo peT pakaD kar kabhi soya nahin hota

'swami' zara suraj ko samundar se nikalo

thak-haar ke yun Dubna achchha nahin hota