dil par rakho nigah jigar par nazar karo

dil par rakho nigāh jigar par nazar karo

maqdūr ho to zaat meñ apnī safar karo

hañgām-e-ḳhair-maqdam-e-sub.h-e-nashāt hai

parvāna-vār shaam se raqs-e-sharar karo

zanjīr toḌnā bhī baḌā kaam thā magar

fursat meñ ho to zīnat-e-dīvār-o-dar karo

māyūs-kun hai ālam-e-imkāñ abhī to kyā

duniyā-e-mumkināt pe apnī nazar karo

jo ġham bhī de hayāt ḳhushī se qubūl ho

itnā to ehtimām ġham-e-mo'tabar karo

apnoñ ko to nibāhane vaale hazār haiñ

insān ho to dil meñ adū ke bhī ghar karo

jaatā nahīñ ye tiir kisī haal meñ ḳhatā

har marhala hayāt kā ulfat se sar karo

sab luT rahe haiñ bar-sar-e-bāzār in dinoñ

kis se kaheñ ki qadr-e-matā-e-hunar karo

ik rahguzār manzil-e-mastī hai mai-kada

har riñd ko ḳhushī se sharīk-e-safar karo

ai 'dil' bahut ḳharāb haiñ hālāt shahr ke

yaañ jis kisī se baat karo muḳhtasar karo

dil par rakho nigah jigar par nazar karo

maqdur ho to zat mein apni safar karo

hangam-e-KHair-maqdam-e-subh-e-nashat hai

parwana-war sham se raqs-e-sharar karo

zanjir toDna bhi baDa kaam tha magar

fursat mein ho to zinat-e-diwar-o-dar karo

mayus-kun hai aalam-e-imkan abhi to kya

duniya-e-mumkinat pe apni nazar karo

jo gham bhi de hayat KHushi se qubul ho

itna to ehtimam gham-e-mo'tabar karo

apnon ko to nibahane wale hazar hain

insan ho to dil mein adu ke bhi ghar karo

jata nahin ye tir kisi haal mein KHata

har marhala hayat ka ulfat se sar karo

sab luT rahe hain bar-sar-e-bazar in dinon

kis se kahen ki qadr-e-mata-e-hunar karo

ek rahguzar manzil-e-masti hai mai-kada

har rind ko KHushi se sharik-e-safar karo

ai 'dil' bahut KHarab hain haalat shahr ke

yan jis kisi se baat karo muKHtasar karo