dil par tere hijran mein qayamat ki ghaDi hai

dil par tire hijrāñ meñ qayāmat kī ghaḌī hai

ehsās ke tābūt meñ ik laash paḌī hai

kīchaḌ kā takalluf na karo shahr ke logo

āñchal pe to rusvā.ī kī ik chhīñT baḌī hai

siine se lago hañs ke rahe yaad ye lamha

kho kar hameñ rone ko to ik umr paḌī hai

mumkin hai to ik baar use toḌ de aa kar

barsoñ hue dahlīz pe ummīd khaḌī hai

kis tarah mirī ḳhaak se niklegī vo sūrat

āñkhoñ meñ basī hai to kahīñ dil maiñ gaḌī hai

siine meñ na.ī saañs utārī hai kisī ne

barsoñ se paḌī gard mire dil se jhaḌī hai

koshish to bahut kī thī ki shīshe meñ utārūñ

tasvīr bhī us shaḳhs kī pathar meñ jaḌī hai

dil par tere hijran mein qayamat ki ghaDi hai

ehsas ke tabut mein ek lash paDi hai

kichaD ka takalluf na karo shahr ke logo

aanchal pe to ruswai ki ek chhinT baDi hai

sine se lago hans ke rahe yaad ye lamha

kho kar hamein rone ko to ek umr paDi hai

mumkin hai to ek bar use toD de aa kar

barson hue dahliz pe ummid khaDi hai

kis tarah meri KHak se niklegi wo surat

aankhon mein basi hai to kahin dil main gaDi hai

sine mein nai sans utari hai kisi ne

barson se paDi gard mere dil se jhaDi hai

koshish to bahut ki thi ki shishe mein utarun

taswir bhi us shaKHs ki pathar mein jaDi hai