dil pe guzri jo zaban tak nahin lane wale

dil pe guzrī jo zabāñ tak nahīñ laane vaale

ham haiñ zaḳhmoñ ke bahut naaz uThāne vaale

kaisī bastī hai ḳhudā jaane ye asrār hai kyā

lauT kar phir nahīñ aate kabhī jaane vaale

tū bahut shor machātā hai mire pahlū meñ

ham tirī baat meñ ai dil nahīñ aane vaale

apnī barbādī kā ham ko to koī ġham bhī nahīñ

kyoñ qayāmat ye uThāte haiñ zamāne vaale

tujh ko fursat nahīñ duniyā to koī baat nahīñ

qissa-e-dard kahāñ ham bhī sunāne vaale

biich rasta meñ badal lī haiñ jo rāheñ tum ne

duur tak ham bhī kahāñ saath the jaane vaale

apnī miTTī kī mohabbat meñ hue ḳhvār 'nadīm'

gaañv ko chhoḌ ke jaate rahe jaane vaale

dil pe guzri jo zaban tak nahin lane wale

hum hain zaKHmon ke bahut naz uThane wale

kaisi basti hai KHuda jaane ye asrar hai kya

lauT kar phir nahin aate kabhi jaane wale

tu bahut shor machata hai mere pahlu mein

hum teri baat mein ai dil nahin aane wale

apni barbaadi ka hum ko to koi gham bhi nahin

kyon qayamat ye uThate hain zamane wale

tujh ko fursat nahin duniya to koi baat nahin

qissa-e-dard kahan hum bhi sunane wale

bich rasta mein badal li hain jo rahen tum ne

dur tak hum bhi kahan sath the jaane wale

apni miTTi ki mohabbat mein hue KHwar 'nadim'

ganw ko chhoD ke jate rahe jaane wale