dil pe kuchh aise kisi yaad ke dar khulte hain

dil pe kuchh aise kisī yaad ke dar khulte haiñ

jaise sahrāoñ kī vus.at meñ safar khulte haiñ

ham se milte haiñ sar-e-dasht bagūle jhuk kar

paañv dariyāoñ meñ rakkheñ to bhañvar khulte haiñ

rāh-gum-karda sitāroñ ke liye āḳhir-e-shab

ham faqīrān-e-dar-e-ishq ke ghar khulte haiñ

kaun se log haiñ jo phirte haiñ ta.abīr liye

kin duāoñ ke liye bāb-e-asar khulte haiñ

aag taḳhlīq kī jab ruuh ko laavā kar de

tab kahīñ jā ke mirī jaan hunar khulte haiñ

roz dastak sī koī detā hai siine pe 'nabīl'

roz mujh meñ kisī āvāz ke par khulte haiñ

dil pe kuchh aise kisi yaad ke dar khulte hain

jaise sahraon ki wusat mein safar khulte hain

hum se milte hain sar-e-dasht bagule jhuk kar

panw dariyaon mein rakkhen to bhanwar khulte hain

rah-gum-karda sitaron ke liye aaKHir-e-shab

hum faqiran-e-dar-e-ishq ke ghar khulte hain

kaun se log hain jo phirte hain tabir liye

kin duaon ke liye bab-e-asar khulte hain

aag taKHliq ki jab ruh ko lawa kar de

tab kahin ja ke meri jaan hunar khulte hain

roz dastak si koi deta hai sine pe 'nabil'

roz mujh mein kisi aawaz ke par khulte hain