dil pe zaKHm khane se ashk-e-KHun bahane tak

dil pe zaḳhm khāne se ashk-e-ḳhūñ bahāne tak

ham ne ġham sahe kyā kyā kaif-e-zīst paane tak

fasl-e-nau-bahārāñ ko kyā ḳhabar ki ġhunchoñ par

kitne hashr guzre haiñ khil ke muskurāne tak

dil ne azm-o-himmat se kaam le liyā varna

ham pe kyā nahīñ biitī aarzū bar aane tak

iztirāb-e-paiham se zindagī ibārat hai

dil kī qadr-o-qīmat hai nāz-e-ġham uThāne tak

manziloñ kī dushvārī rāstoñ ke sannāTe

haiñ tamām andeshe ik qadam baḌhāne tak

ho fazā kī vus.at kā us ko ḳhaak andāza

hadd-e-fikr ho jis kī apne āshiyāne tak

sach to hai yahī 'manshā' zindagī kī rāhoñ meñ

tīrgī kā ḳhatra hai sham-e-dil jalāne tak

dil pe zaKHm khane se ashk-e-KHun bahane tak

hum ne gham sahe kya kya kaif-e-zist pane tak

fasl-e-nau-bahaaran ko kya KHabar ki ghunchon par

kitne hashr guzre hain khil ke muskurane tak

dil ne azm-o-himmat se kaam le liya warna

hum pe kya nahin biti aarzu bar aane tak

iztirab-e-paiham se zindagi ibarat hai

dil ki qadr-o-qimat hai naz-e-gham uThane tak

manzilon ki dushwari raston ke sannaTe

hain tamam andeshe ek qadam baDhane tak

ho faza ki wusat ka us ko KHak andaza

hadd-e-fikr ho jis ki apne aashiyane tak

sach to hai yahi 'mansha' zindagi ki rahon mein

tirgi ka KHatra hai sham-e-dil jalane tak