دل پہ زخم کھانے سے اشک خوں بہانے تک

دل پہ زخم کھانے سے اشک خوں بہانے تک

ہم نے غم سہے کیا کیا کیف زیست پانے تک

فصل نو بہاراں کو کیا خبر کہ غنچوں پر

کتنے حشر گزرے ہیں کھل کے مسکرانے تک

دل نے عزم و ہمت سے کام لے لیا ورنہ

ہم پہ کیا نہیں بیتی آرزو بر آنے تک

اضطراب پئےہم سے زندگی عبارت ہے

دل کی قدر و قیمت ہے ناز غم اٹھانے تک

منزلوں کی دشواری راستوں کے سناٹے

ہیں تمام اندیشے اک قدم بڑھانے تک

ہو فضا کی وسعت کا اس کو خاک اندازہ

حد فکر ہو جس کی اپنے آشیانے تک

سچ تو ہے یہی منشاؔ زندگی کی راہوں میں

تیرگی کا خطرہ ہے شمع دل جلانے تک