دل پھر رہا ہے درد محبت لئے ہوئے

دل پھر رہا ہے درد محبت لئے ہوئے

پھرتی ہے بد نصیب کو شامت لئے ہوئے

رکھا رہے گا حسن جو جانباز اٹھ گئے

بیٹھے رہو گے چاند سی صورت لئے ہوئے

لاؤ تو میں ہی اس کی حقیقت کو دیکھ لوں

ہے کس قدر مجاز حقیقت لئے ہوئے

تلقین صبر و شکر ہے واعظ کا مشغلہ

کیا اس کی گفتگو ہے نحوست لئے ہوئے

میں بے نیاز ہوں مرا سامان پوچھئے

بیٹھا ہوا ہوں رخت قناعت لئے ہوئے

رہ جائے گا کہاں یہ مری غم کی کیا بساط

تم آ تو جاؤ اپنی مسرت لئے ہوئے

رحمت کہیں تمام ہی کر دے نہ سب حساب

جائے نہ حشر آ کے ندامت لئے ہوئے

اے اہل مال جاؤ تو قاروں سے مل تو لو

پوچھو کہاں چلا ہے یہ دولت لئے ہوئے

چکھنا ہے سب کو ذائقۂ تلخ موت کا

ہم تم ہیں خوشترؔ ایک ہی دعوت لئے ہوئے