dil phir raha hai dard-e-mohabbat liye hue

dil phir rahā hai dard-e-mohabbat liye hue

phirtī hai bad-nasīb ko shāmat liye hue

rakkhā rahegā husn jo jāñbāz uTh ga.e

baiThe rahoge chāñd sī sūrat liye hue

laao to maiñ hī is kī haqīqat ko dekh luuñ

hai kis qadar majāz haqīqat liye hue

talqīn-e-sabr-o-shukr hai vaa.iz kā mashġhala

kyā us kī guftugū hai nahūsat liye hue

maiñ be-niyāz huuñ mirā sāmān pūchhiye

baiThā huā huuñ raḳht-e-qanā.at liye hue

rah jā.egā kahāñ ye mirī ġham kī kyā bisāt

tum aa to jaao apnī masarrat liye hue

rahmat kahīñ tamām hī kar de na sab hisāb

jaa.e na hashr aa ke nadāmat liye hue

ai ahl-e-māl jaao to qārūñ se mil to lo

pūchho kahāñ chalā hai ye daulat liye hue

chakhnā hai sab ko zā.iqa-e-talḳh maut kā

ham tum haiñ 'ḳhushtar' ek hī dāvat liye hue

dil phir raha hai dard-e-mohabbat liye hue

phirti hai bad-nasib ko shamat liye hue

rakkha rahega husn jo jaanbaz uTh gae

baiThe rahoge chand si surat liye hue

lao to main hi is ki haqiqat ko dekh lun

hai kis qadar majaz haqiqat liye hue

talqin-e-sabr-o-shukr hai waiz ka mashghala

kya us ki guftugu hai nahusat liye hue

main be-niyaz hun mera saman puchhiye

baiTha hua hun raKHt-e-qanaat liye hue

rah jaega kahan ye meri gham ki kya bisat

tum aa to jao apni masarrat liye hue

rahmat kahin tamam hi kar de na sab hisab

jae na hashr aa ke nadamat liye hue

ai ahl-e-mal jao to qarun se mil to lo

puchho kahan chala hai ye daulat liye hue

chakhna hai sab ko zaiqa-e-talKH maut ka

hum tum hain 'KHushtar' ek hi dawat liye hue