dil pukara phans ke ku-e-yar mein

dil pukārā phañs ke kū-e-yār meñ

rok rakkhā hai mujhe gulzār meñ

farq kyā maqtal meñ aur gulzār meñ

Dhaal meñ haiñ phuul phal talvār meñ

lutf duniyā meñ nahīñ takrār meñ

lekin un ke bosa-e-ruḳhsār meñ

thā jo shab ko sāya-e-ruḳhsār meñ

tāzgī kitnī hai baasī haar meñ

fart-e-māyūsī ne murda hasrateñ

dafn kar dī haiñ dil-e-bīmār meñ

shaad ho jaatī hai duniyā ai ruupe

kyā karāmat hai tirī jhankār meñ

ātish-e-ulfat kī dhaḌkan baḌh ga.ī

gir paḌā dil shola-e-ruḳhsār meñ

aah ke qabze meñ hai tāsīr yā

teġh hai dast-e-alam-bardār meñ

nashtar-e-mizhgāñ kī tezī ke sabab

ek kāñTā hai dil-e-pur-ḳhār meñ

āb-e-paikāñ paas hai lekin nasīb

phir bhī ḳhushkī hai lab-e-sofār meñ

ḳhair ho 'parvīñ' dil-e-muztar mirā

le chalā phir kūcha-e-dildār meñ

dil pukara phans ke ku-e-yar mein

rok rakkha hai mujhe gulzar mein

farq kya maqtal mein aur gulzar mein

Dhaal mein hain phul phal talwar mein

lutf duniya mein nahin takrar mein

lekin un ke bosa-e-ruKHsar mein

tha jo shab ko saya-e-ruKHsar mein

tazgi kitni hai basi haar mein

fart-e-mayusi ne murda hasraten

dafn kar di hain dil-e-bimar mein

shad ho jati hai duniya ai rupe

kya karamat hai teri jhankar mein

aatish-e-ulfat ki dhaDkan baDh gai

gir paDa dil shola-e-ruKHsar mein

aah ke qabze mein hai tasir ya

tegh hai dast-e-alam-bardar mein

nashtar-e-mizhgan ki tezi ke sabab

ek kanTa hai dil-e-pur-KHar mein

aab-e-paikan pas hai lekin nasib

phir bhi KHushki hai lab-e-sofar mein

KHair ho 'parwin' dil-e-muztar mera

le chala phir kucha-e-dildar mein