dil-ruba tujh sa dusra na hua

dil-rubā tujh sā dūsrā na huā

ai hasīñ tū magar ḳhudā na huā

jo mohabbat meñ mubtalā na huā

dard-e-dil se vo āshnā na huā

merī miTTī vahāñ pahuñch jaatī

tujh se itnā bhī ai sabā na huā

roz aate haiñ vo ayādat ko

maiñ na achchhā huā burā na huā

tū hamesha judā rahā mujh se

terā armāñ kabhī judā na huā

apnī rusvā.ī un kī badnāmī

is mohabbat meñ haa.e kyā na huā

bevafā.ī kī had hai ye 'muztar'

rah ke pahlū meñ dil mirā na huā

dil-ruba tujh sa dusra na hua

ai hasin tu magar KHuda na hua

jo mohabbat mein mubtala na hua

dard-e-dil se wo aashna na hua

meri miTTi wahan pahunch jati

tujh se itna bhi ai saba na hua

roz aate hain wo ayaadat ko

main na achchha hua bura na hua

tu hamesha juda raha mujh se

tera arman kabhi juda na hua

apni ruswai un ki badnami

is mohabbat mein hae kya na hua

bewafai ki had hai ye 'muztar'

rah ke pahlu mein dil mera na hua