dil se har dam hamein aawaz laga aati hai

dil se har dam hameñ āvāz lagā aatī hai

band kānoñ ko bhī girye kī sadā aatī hai

dil se hai aañkh tak aa.ī asar-e-garmī-e-shauq

ashk-e-hasrat se nigah ābla-pā aatī hai

gul huā koī charāġh-e-saharī o bulbul

haath maltī huī pattoñ se sabā aatī hai

terī āñkhoñ kā huuñ bīmār maiñ o īsā-dam

na duā aatī hai mujh ko na davā aatī hai

aa.ina saaf sikandar ko dikhāyā tū ne

ḳhuub ai ḳhizr tujhe raah banā aatī hai

chhū liyā dhoke se dāmān-e-sabā tū ne to kyā

ġhuncha-e-gul kahīñ muTThī meñ havā aatī hai

jis qadar vasl-e-butāñ kā tumheñ rahtā hai firāq

ai 'nasīm' itnī kabhī yād-e-ḳhudā aatī hai

dil se har dam hamein aawaz laga aati hai

band kanon ko bhi girye ki sada aati hai

dil se hai aankh tak aai asar-e-garmi-e-shauq

ashk-e-hasrat se nigah aabla-pa aati hai

gul hua koi charagh-e-sahari o bulbul

hath malti hui patton se saba aati hai

teri aankhon ka hun bimar main o isa-dam

na dua aati hai mujh ko na dawa aati hai

aaina saf sikandar ko dikhaya tu ne

KHub ai KHizr tujhe rah bana aati hai

chhu liya dhoke se daman-e-saba tu ne to kya

ghuncha-e-gul kahin muTThi mein hawa aati hai

jis qadar wasl-e-butan ka tumhein rahta hai firaq

ai 'nasim' itni kabhi yaad-e-KHuda aati hai