dil se hasin yaad purani chali gai

dil se hasīn yaad purānī chalī ga.ī

chhallā nahīñ gayā ki nishānī chalī ga.ī

ham to nibhāte sirf ye kirdār rah ga.e

ab hai pata chalā ki kahānī chalī ga.ī

ḳhāmosh lab hue to ka.ī baat dab ga.iiñ

chehre kā nuur ḳhuuñ kī ravānī chalī ga.ī

ye zindagī kā khel hai shatranj kī tarah

raaja bachāte ham rahe raanī chalī ga.ī

qismat bhī koī chiiz hai ye mānte rahe

ummīd ab to vo bhī suhānī chalī ga.ī

mujh se kabhī suḳhan kī kitābat nahīñ huī

mā'nī samajh ga.e to girānī chalī ga.ī

hālāt ye hue haiñ mobile ke daur meñ

bachchoñ kī yād-dāsht zabānī chalī ga.ī

chhoTī sī 'umr se hī 'abhay' dar-ba-dar rahe

shāyad tabhī to soch siyānī chalī ga.ī

dil se hasin yaad purani chali gai

chhalla nahin gaya ki nishani chali gai

hum to nibhate sirf ye kirdar rah gae

ab hai pata chala ki kahani chali gai

KHamosh lab hue to kai baat dab gain

chehre ka nur KHun ki rawani chali gai

ye zindagi ka khel hai shatranj ki tarah

raja bachate hum rahe rani chali gai

qismat bhi koi chiz hai ye mante rahe

ummid ab to wo bhi suhani chali gai

mujh se kabhi suKHan ki kitabat nahin hui

ma'ni samajh gae to girani chali gai

haalat ye hue hain mobile ke daur mein

bachchon ki yaad-dasht zabani chali gai

chhoTi si 'umr se hi 'abhay' dar-ba-dar rahe

shayad tabhi to soch siyani chali gai