دل سے اک دوسرے کے پیارے ہیں

دل سے اک دوسرے کے پیارے ہیں

ان کے ہم اور وہ ہمارے ہیں

اپنا دامن جو وہ پسارے ہیں

میرے آنسو بھی چاند تارے ہیں

بے خودی بھی ہے ہوشیاری بھی

چشم ساقی کے کیا اشارے ہیں

غیر کو دیکھ کر ہمیں دیکھا

تیر پر تیر تم نے مارے ہیں

حسن پردے میں بھی نہیں چھپتا

ان کے چلمن سے بھی اشارے ہیں

وہ حسین ان کے ہم جلیس حسین

چاند وہ دوسرے ستارے ہیں

بس یہی حاصل محبت ہے

تم یہ کہہ دو کہ ہم تمہارے ہیں

ان کی آنکھیں ہیں ڈھونڈھتی نشترؔ

جن کے آنکھوں ہی میں نظارے ہیں