dil se mere tanhai ki shiddat nahin jati

dil se mire tanhā.ī kī shiddat nahīñ jaatī

ab tū bhī chalā aa.e to vahshat nahīñ jaatī

is daur kī ta.alīm kā me.aar ajab hai

ta.alīm to aatī hai jahālat nahīñ jaatī

kyā soch ke ummīd-e-vafā bāñdhī thī tum se

ik umr huī dil kī nadāmat nahīñ jaatī

muflis bhī to ḳhuddār huā karte haiñ logo

ġhurbat meñ bhī insāñ kī sharāfat nahīñ jaatī

le jaatī haiñ ab tak bhī mirī niiñd churā kar

ab tak bhī in āñkhoñ kī sharārat nahīñ jaatī

de detā hai allāh mujhe hasb-e-zarūrat

ab le ke kisī dar pe zarūrat nahīñ jaatī

sau baar tirī jaan pe ban aa.ī hai 'farhat'

phir bhī tirī haq-goī kī aadat nahīñ jaatī

dil se mere tanhai ki shiddat nahin jati

ab tu bhi chala aae to wahshat nahin jati

is daur ki talim ka mear ajab hai

talim to aati hai jahaalat nahin jati

kya soch ke ummid-e-wafa bandhi thi tum se

ek umr hui dil ki nadamat nahin jati

muflis bhi to KHuddar hua karte hain logo

ghurbat mein bhi insan ki sharafat nahin jati

le jati hain ab tak bhi meri nind chura kar

ab tak bhi in aankhon ki shararat nahin jati

de deta hai allah mujhe hasb-e-zarurat

ab le ke kisi dar pe zarurat nahin jati

sau bar teri jaan pe ban aai hai 'farhat'

phir bhi teri haq-goi ki aadat nahin jati