dil se puchha tu kahan hai to kaha tujhko kya

dil se pūchhā tū kahāñ hai to kahā tujh ko kyā

kis kī zulfoñ meñ nihāñ hai to kahā tujh ko kyā

chashm-e-giryāñ se shab-e-vasl meñ pūchhā maiñ ne

ab tū kyuuñ ashk-fishāñ hai to kahā tujh ko kyā

jab kahā maiñ ne ki niiñ bolte ho gaalī bin

jaan ye kaun zabāñ hai to kahā tujh ko kyā

kahne laagā dil-e-gum-gashta tirā hai mujh paas

jab kahā maiñ ne kahāñ hai to kahā tujh ko kyā

jab kahā maiñ ne ki ai jaan tirī sūrat par

shefta pīr-o-javāñ hai to kahā tujh ko kyā

jab kahā maiñ ne ki ai sarv-e-riyāz-e-ḳhūbī

kis kā tū āfat-e-jāñ hai to kahā tujh ko kyā

dil se 'bedār' ne pūchhā ki tire siine par

kis ke nāvak kā nishāñ hai to kahā tujh ko kyā

dil se puchha tu kahan hai to kaha tujh ko kya

kis ki zulfon mein nihan hai to kaha tujh ko kya

chashm-e-giryan se shab-e-wasl mein puchha main ne

ab tu kyun ashk-fishan hai to kaha tujh ko kya

jab kaha main ne ki nin bolte ho gali bin

jaan ye kaun zaban hai to kaha tujh ko kya

kahne laga dil-e-gum-gashta tera hai mujh pas

jab kaha main ne kahan hai to kaha tujh ko kya

jab kaha main ne ki ai jaan teri surat par

shefta pir-o-jawan hai to kaha tujh ko kya

jab kaha main ne ki ai sarw-e-riyaz-e-KHubi

kis ka tu aafat-e-jaan hai to kaha tujh ko kya

dil se 'bedar' ne puchha ki tere sine par

kis ke nawak ka nishan hai to kaha tujh ko kya