دل سے ترے خیال کو کیسے بھلائیں ہم

دل سے ترے خیال کو کیسے بھلائیں ہم

یہ ایسی چیز کب ہے جسے بھول جائیں ہم

یوں بھی گزر ہی جائیں گے لمحے حیات کے

تم مسکراؤ انجمن غم سجائیں ہم

او دینے والے ہم کو خوشی دے کہ رنج دے

لیکن رہے خیال کہ گھبرا نہ جائیں ہم

اتنی خوشی نہ بخش کہ آنسو نکل پڑیں

غم بھی نہ اس قدر ہوں کہ ہنسنے نہ پائیں ہم

روٹھی ہوئی ہے موت بھی دنیا کے ساتھ ساتھ

اب ایسی زندگی کو کہاں لے کے جائیں ہم

للہ یوں نگاہ کرم سے نہ دیکھیے

غم چھن گیا تو ڈر ہے کہیں مر نہ جائیں ہم

مرنا وقار عشق پہ عین حیات ہے

دانشؔ اجل سے کس لیے دامن بچائیں ہم