dil se tere KHayal ko kaise bhulaen hum

dil se tire ḳhayāl ko kaise bhulā.eñ ham

ye aisī chiiz kab hai jise bhuul jaa.eñ ham

yuuñ bhī guzar hī jā.eñge lamhe hayāt ke

tum muskurāo anjuman-e-ġham sajā.eñ ham

o dene vaale ham ko ḳhushī de ki ranj de

lekin rahe ḳhayāl ki ghabrā na jaa.eñ ham

itnī ḳhushī na baḳhsh ki aañsū nikal paḌeñ

ġham bhī na is qadar hoñ ki hañsne na paa.eñ ham

rūThī huī hai maut bhī duniyā ke saath saath

ab aisī zindagī ko kahāñ le ke jaa.eñ ham

lillāh yuuñ nigāh-e-karam se na dekhiye

ġham chhin gayā to Dar hai kahīñ mar na jaa.eñ ham

marnā vaqār-e-‘ishq pe ‘ain-e-hayāt hai

'dānish' ajal se kis liye dāman bachā.eñ ham

dil se tere KHayal ko kaise bhulaen hum

ye aisi chiz kab hai jise bhul jaen hum

yun bhi guzar hi jaenge lamhe hayat ke

tum muskurao anjuman-e-gham sajaen hum

o dene wale hum ko KHushi de ki ranj de

lekin rahe KHayal ki ghabra na jaen hum

itni KHushi na baKHsh ki aansu nikal paDen

gham bhi na is qadar hon ki hansne na paen hum

ruThi hui hai maut bhi duniya ke sath sath

ab aisi zindagi ko kahan le ke jaen hum

lillah yun nigah-e-karam se na dekhiye

gham chhin gaya to Dar hai kahin mar na jaen hum

marna waqar-e-‘ishq pe ‘ain-e-hayat hai

'danish' ajal se kis liye daman bachaen hum