dil shagufta hai ke phir koi KHata hone ko hai

dil shagufta hai ke phir koī ḳhatā hone ko hai

jaise agle hī qadam par hādisa hone ko hai

jaane kyā kyā ho gayā hai ho rahā hai jaane kyā

aane vaale vaqt meñ ab jaane kyā hone ko hai

vo gayā to lauT kar sāñseñ na aa.iiñ jism meñ

yuuñ lagā ki zindagī se fāsla hone ko hai

Daal dī kashtī bhañvar meñ bas isī ummīd par

ek tinke kā mujhe bhī aasrā hone ko hai

jhuk gayā hai āsmāñ uḌne lagī hai ye zamīñ

lag rahā sāvan meñ ab ke kuchh nayā hone ko hai

jis ne mere paañv ko zaḳhmī kiyā thā ek din

rāste kā ab vo patthar devtā hone ko hai

phir suhānī vādiyoñ se ishq ne dī hai sadā

lag rahā hai ratjagoñ kā silsila hone ko hai

zindagī kī uljhaneñ kāġhaz pe likkhī thiiñ kabhī

aa rahī hai ye ḳhabar vo falsafa hone ko hai

mil gayā vo ik guhar jo apne man kī siip meñ

aisā lagtā hai ki ḳhud se rābta hone ko hai

chhū liyā ākāsh ne jhuk kar zamīñ ke jism ko

muḳhtasar sā ek pal ahd-e-vafā hone ko hai

ham to aisī fikr se ab ho chuke haiñ be-niyāz

hone do jo 'sāhiba' achchhā burā hone ko hai

dil shagufta hai ke phir koi KHata hone ko hai

jaise agle hi qadam par hadisa hone ko hai

jaane kya kya ho gaya hai ho raha hai jaane kya

aane wale waqt mein ab jaane kya hone ko hai

wo gaya to lauT kar sansen na aain jism mein

yun laga ki zindagi se fasla hone ko hai

Dal di kashti bhanwar mein bas isi ummid par

ek tinke ka mujhe bhi aasra hone ko hai

jhuk gaya hai aasman uDne lagi hai ye zamin

lag raha sawan mein ab ke kuchh naya hone ko hai

jis ne mere panw ko zaKHmi kiya tha ek din

raste ka ab wo patthar dewta hone ko hai

phir suhani wadiyon se ishq ne di hai sada

lag raha hai ratjagon ka silsila hone ko hai

zindagi ki uljhanen kaghaz pe likkhi thin kabhi

aa rahi hai ye KHabar wo falsafa hone ko hai

mil gaya wo ek guhar jo apne man ki sip mein

aisa lagta hai ki KHud se rabta hone ko hai

chhu liya aakash ne jhuk kar zamin ke jism ko

muKHtasar sa ek pal ahd-e-wafa hone ko hai

hum to aisi fikr se ab ho chuke hain be-niyaz

hone do jo 'sahiba' achchha bura hone ko hai