dil-shikasta hue TuTa hua paiman bane

dil-shikasta hue TuuTā huā paimān bane

ham vahī haiñ jo tumheñ dekh ke anjān bane

chand yādeñ mirī zanjīr-e-shab-o-roz banīñ

chand lamhe mire kho.e hue ausān bane

vo bhī kyā fasl thī kyā sho.ala-e-ḳhirman thā buland

vo bhī kyā din the ki dāman se garebān bane

in kī duurī kā bhī ehsāñ hai mirī sāñsoñ par

mujh se is tarah vo bichhḌe ki nigahbān bane

ahl-e-sāhil se nadāmat sī nadāmat hai ki ham

ek kashtī-e-tah-e-āb kā sāmān bane

haa.e kyā aas thī kyā kyā na tumheñ banñā thā

tum bane bhī to mire dard kī pahchān bane

ghar sajānā to kujā 'shāz' luTā bhī na sakūñ

in se shikva hai ki vo kyuuñ mire mehmān bane

dil-shikasta hue TuTa hua paiman bane

hum wahi hain jo tumhein dekh ke anjaan bane

chand yaaden meri zanjir-e-shab-o-roz banin

chand lamhe mere khoe hue ausan bane

wo bhi kya fasl thi kya shoala-e-KHirman tha buland

wo bhi kya din the ki daman se gareban bane

in ki duri ka bhi ehsan hai meri sanson par

mujh se is tarah wo bichhDe ki nigahban bane

ahl-e-sahil se nadamat si nadamat hai ki hum

ek kashti-e-tah-e-ab ka saman bane

hae kya aas thi kya kya na tumhein banna tha

tum bane bhi to mere dard ki pahchan bane

ghar sajaana to kuja 'shaz' luTa bhi na sakun

in se shikwa hai ki wo kyun mere mehman bane