dil surKH gulab sa mahkega din badlenge

dil surḳh gulāb sā mahkegā din badleñge

ye sahrā rang uḌā.egā din badleñge

vo rahne vaalā dūr-darāz sitāre kā

ik raushan ḳhat mujhe likkhegā din badleñge

vo chāñd se agle moḌ pe mujh se milne ko

ka.ī sadiyāñ paaT ke aa.egā din badleñge

kohre meñ lipTī kam-raushan is bastī meñ

koī hiir sunāne aa.egā din badleñge

phir jaag uThegā soyā mahal chup TūTegī

phir dil tyauhār manā.egā din badleñge

ye dhuāñ badan kā raqs karegā har lai par

koī haal mire sang khelegā din badleñge

din badleñge aur rāteñ sej sajā.eñgī

phir hijr visāl se lipTegā din badleñge

ye barf kā TukḌā dil merā qātil merā

tirī nīm-nigāh se pighlegā din badleñge

maiñ TuuT rahūñgī ek qadīm rivāyat sī

vo na.e zamāne lā.egā din badleñge

mire mo.ajiza-gar tirī dā.īñ aañkh ke nīlam meñ

ik sa.ad sitāra chamkegā din badleñge

merī oḌhniyāñ sab kesarī rang meñ rañgne ko

rañgrez mirā phir lauTegā din badleñge

jo bichhaḌ gayā thā vaqt kī kachchī saa.at meñ

suntī huuñ palaT kar aa.egā din badleñge

dil surKH gulab sa mahkega din badlenge

ye sahra rang uDaega din badlenge

wo rahne wala dur-daraaz sitare ka

ek raushan KHat mujhe likkhega din badlenge

wo chand se agle moD pe mujh se milne ko

kai sadiyan paT ke aaega din badlenge

kohre mein lipTi kam-raushan is basti mein

koi hir sunane aaega din badlenge

phir jag uThega soya mahal chup TuTegi

phir dil tyauhaar manaega din badlenge

ye dhuan badan ka raqs karega har lai par

koi haal mere sang khelega din badlenge

din badlenge aur raaten sej sajaengi

phir hijr visal se lipTega din badlenge

ye barf ka TukDa dil mera qatil mera

teri nim-nigah se pighlega din badlenge

main TuT rahungi ek qadim riwayat si

wo nae zamane laega din badlenge

mere moajiza-gar teri dain aankh ke nilam mein

ek sad sitara chamkega din badlenge

meri oDhniyan sab kesari rang mein rangne ko

rangrez mera phir lauTega din badlenge

jo bichhaD gaya tha waqt ki kachchi saat mein

sunti hun palaT kar aaega din badlenge