دل طلب گار سہی حشر بہ داماں کیوں ہے

دل طلب گار سہی حشر بہ داماں کیوں ہے

نالہ زن شعلہ بکف شوق فراواں کیوں ہے

محفل ساز و طرب مطلع ویراں کیوں ہے

شیوۂ صبر و سکوں دل سے گریزاں کیوں ہے

کھینچ لایا تھا جو اس دل کو تری محفل میں

وہی انداز نظر آج پشیماں کیوں ہے

سرنگوں راہ میں ہر گام ہوا جاتا ہے

مضمحل خوئے سفر درد پشیماں کیوں ہے

تلخیٔ کام و دہن کشمکش ذہن و وجود

ایک ہستی کے لئے یہ سر و ساماں کیوں ہے

دشت پیمائی میں بھی وحشت جاں اتنی نہ تھی

تشنگی ساحل دریا پہ ہراساں کیوں ہے