dil to hai ek magar dard ke KHane hain bahut

dil to hai ek magar dard ke ḳhāne haiñ bahut

is liye mujh ko bhī rone ke bahāne haiñ bahut

ab na.e dost banāne kī to himmat hī nahīñ

dil se nazdīk haiñ jo dost purāne haiñ bahut

dil sukūñ paa.e jahāñ aise basere kitne

yuuñ to kahiye ki musāfir ko Thikāne haiñ bahut

dar kabhī ḳhvāb kā khultā hai azāboñ kī taraf

ye na kahiye ki sabhī ḳhvāb suhāne haiñ bahut

kaun sī baat kareñ kis se bachā.eñ pahlū

jo kabhī ḳhatm na hoñ aise fasāne haiñ bahut

'raziya' kyā kaam hameñ ganj-e-girāñ-māya se

ham se logoñ ke liye sher-ḳhazāne haiñ bahut

dil to hai ek magar dard ke KHane hain bahut

is liye mujh ko bhi rone ke bahane hain bahut

ab nae dost banane ki to himmat hi nahin

dil se nazdik hain jo dost purane hain bahut

dil sukun pae jahan aise basere kitne

yun to kahiye ki musafir ko Thikane hain bahut

dar kabhi KHwab ka khulta hai azabon ki taraf

ye na kahiye ki sabhi KHwab suhane hain bahut

kaun si baat karen kis se bachaen pahlu

jo kabhi KHatm na hon aise fasane hain bahut

'raziya' kya kaam hamein ganj-e-giran-maya se

hum se logon ke liye sher-KHazane hain bahut