dil to ek shaKHs ko naKHchir banane mein gaya

dil to ik shaḳhs ko naḳhchīr banāne meñ gayā

sāz-e-dil naġhma-e-dil-gīr banāne meñ gayā

raat ik ḳhvāb jo dekhā to huā ye mālūm

din bhī us ḳhvāb kī tasvīr banāne meñ gayā

partav-e-ḳhāna-e-mauhūm ġhanīmat thā magar

vo bhī ik naqsha-e-tāmīr banāne meñ gayā

ruuh to ruuh hai kuchh bas nahīñ is par lekin

ye badan ḳhaak ko iksīr banāne meñ gayā

yaar to dirham o dīnār banāne meñ ga.e

aur maiñ ishq kī jāgīr banāne meñ gayā

sher tāsīr se ḳhālī huā vaqt-e-tābīr

nafs-e-mazmūn bhī taqrīr banāne meñ gayā

dil to ek shaKHs ko naKHchir banane mein gaya

saz-e-dil naghma-e-dil-gir banane mein gaya

raat ek KHwab jo dekha to hua ye malum

din bhi us KHwab ki taswir banane mein gaya

partaw-e-KHana-e-mauhum ghanimat tha magar

wo bhi ek naqsha-e-tamir banane mein gaya

ruh to ruh hai kuchh bas nahin is par lekin

ye badan KHak ko iksir banane mein gaya

yar to dirham o dinar banane mein gae

aur main ishq ki jagir banane mein gaya

sher tasir se KHali hua waqt-e-tabir

nafs-e-mazmun bhi taqrir banane mein gaya