dil to kahta hai na ghabraiyega

dil to kahtā hai na ghabrā.iyegā

zulf kahtī hai havā khā.iyegā

ġhair aur dīd-talab misl-e-kalīm

kahīñ bātoñ meñ na aa jā.iyegā

chhū ke vo mus.haf-e-ruḳh hazrat-e-dil

koī salvāt na sunvā.iyegā

bevafā ġhair tumheñ kahtā hai

mujhe nāseh se na laḌvā.iyegā

kyoñ pareshāñ ho ḳham-e-gesū par

dil jo uljhe to na suljhā.iyegā

baḳht-e-ḳhufta kī to āñkheñ khul jaa.eñ

ḳhvāb hī meñ nazar aa jā.iyegā

vaar ḳhanjar kā na ochhā rah jaa.e

ai dam-e-qatl na ghabrā.iyegā

ho chukā ġhair se to va.ada-e-vasl

kuchh mire haq meñ to farmā.iyegā

maiñ uThā kar tumheñ dil meñ rakh luuñ

ghar se bāhar kahīñ mil jā.iyegā

hairat-e-husn se bigḌī sūrat

mujhe ā.īna na dikhlā.iyegā

jhūTī bandish mujhe sab hai ma.alūm

baat nāhaq ko na khulvā.iyegā

'sho.ala' kuchh baat bhī hai ta.ana-e-ġhair

yūhīñ marnā hai to mar jā.iyegā

dil to kahta hai na ghabraiyega

zulf kahti hai hawa khaiyega

ghair aur did-talab misl-e-kalim

kahin baaton mein na aa jaiyega

chhu ke wo mushaf-e-ruKH hazrat-e-dil

koi salwat na sunwaiyega

bewafa ghair tumhein kahta hai

mujhe naseh se na laDwaiyega

kyon pareshan ho KHam-e-gesu par

dil jo uljhe to na suljhaiyega

baKHt-e-KHufta ki to aankhen khul jaen

KHwab hi mein nazar aa jaiyega

war KHanjar ka na ochha rah jae

ai dam-e-qatl na ghabraiyega

ho chuka ghair se to wada-e-wasl

kuchh mere haq mein to farmaiyega

main uTha kar tumhein dil mein rakh lun

ghar se bahar kahin mil jaiyega

hairat-e-husn se bigDi surat

mujhe aaina na dikhlaiyega

jhuTi bandish mujhe sab hai malum

baat nahaq ko na khulwaiyega

'shoala' kuchh baat bhi hai tana-e-ghair

yuhin marna hai to mar jaiyega