dil to kya jaan se guzarna aaya

dil to kyā jaañ se guzarnā aayā

jī uThe log jo marnā aayā

sarf jab tak na huā dil kā lahū

harf meñ rang na bharnā aayā

ho ga.e saare samundar pāyāb

jab hameñ paar utarnā aayā

fasl-e-gul aa.ī to har ġhunche ko

zaḳhm kī tarah nikharnā aayā

jo nafas thā vo rahā garm-e-safar

kab musāfir ko Thaharnā aayā

ik gul-e-tar kī mohabbat meñ hameñ

kitne kāñToñ se guzarnā aayā

vo adab 'ishq ne baḳhshā ki hameñ

muddatoñ baat na karnā aayā

dil pe apne jo paḌī zarb 'ziyā'

TuuT kar ham ko bikharnā aayā

dil to kya jaan se guzarna aaya

ji uThe log jo marna aaya

sarf jab tak na hua dil ka lahu

harf mein rang na bharna aaya

ho gae sare samundar payab

jab hamein par utarna aaya

fasl-e-gul aai to har ghunche ko

zaKHm ki tarah nikharna aaya

jo nafas tha wo raha garm-e-safar

kab musafir ko Thaharna aaya

ek gul-e-tar ki mohabbat mein hamein

kitne kanTon se guzarna aaya

wo adab 'ishq ne baKHsha ki hamein

muddaton baat na karna aaya

dil pe apne jo paDi zarb 'ziya'

TuT kar hum ko bikharna aaya