دل امنگوں سے جو خالی ہو تو بے دل کہئے

دل امنگوں سے جو خالی ہو تو بے دل کہئے

پھر کسے ناقہ سمجھیے کسے محمل کہئے

اب کوئی یار نہ دل دار نہ دشمن نہ حریف

زندگی اس کو تری کون سی منزل کہئے

آج ہر گام پہ مقتل کا گماں ہوتا ہے

کسے قاتل تو کسے کوچۂ قاتل کہئے

زندگی موت سے کچھ کم تو نہیں ہے دشوار

کسے آسان سمجھئے کسے مشکل کہئے

ساری بیماری و صحت کا اسی پر ہے مدار

جسم کا چھوٹا سا ٹکڑا کہ جسے دل کہئے

ساری قربانیاں اب تک کی تو باطل ٹھہریں

کیا بچا پھر کہ جسے زیست کا حاصل کہئے

دل ہی ویران ہو اظہرؔ تو کہاں پھر رونق

راس آ سکتی ہے پھر کون سی محفل کہئے