dil un ka hai kuchh aur to hai unki zaban aur

dil un kā hai kuchh aur to hai un kī zabāñ aur

kartā huuñ yaqīñ jitnā maiñ baḌhtā hai gumāñ aur

manzil kā junūñ hai to har ik gaam hai manzil

miTtā hai nishāñ aur kā to miltā hai nishāñ aur

parvāne ke mātam meñ bujhī sham.a ye kah kar

tere liye hāzir hai ye thoḌā sā dhuāñ aur

pur-dard jo dil meñ unheñ roko na fuġhāñ se

hote haiñ ye ḳhāmosh to karte haiñ fuġhāñ aur

yārab ye sunā hai vo samajhte nahīñ urdu

de aur dil un ko jo na de mujh ko zabāñ aur

hotā hai fuzūñ yaas meñ soz-e-ġham-e-ulfat

bujhtā hai to hotā hai ye dil shoa.la-fishāñ aur

apnoñ hī se tum ishq meñ ghabrā ga.e sāhab

is raah meñ haa.il haiñ abhī sañg-e-garāñ aur

duniyā meñ to mamnūa hai jannat meñ hai jaa.ez

kyā baat hai vaa.iz kī yahāñ aur vahāñ aur

hotī hai zabāñ band to kyā kuchh nahīñ kahtī

ruktī hai ye talvār to hotī hai ravāñ aur

asnām-tarāshī bhī baḌī chiiz hai lekin

hai nāzukī-e-kārgah-e-shīsha-garāñ aur

kahne ko to ai 'arsh' suḳhan-sanj haiñ ham bhī

haq ye hai ki 'ġhālib' kā hai andāz-e-bayāñ aur

dil un ka hai kuchh aur to hai un ki zaban aur

karta hun yaqin jitna main baDhta hai guman aur

manzil ka junun hai to har ek gam hai manzil

miTta hai nishan aur ka to milta hai nishan aur

parwane ke matam mein bujhi shama ye kah kar

tere liye hazir hai ye thoDa sa dhuan aur

pur-dard jo dil mein unhen roko na fughan se

hote hain ye KHamosh to karte hain fughan aur

yarab ye suna hai wo samajhte nahin urdu

de aur dil un ko jo na de mujh ko zaban aur

hota hai fuzun yas mein soz-e-gham-e-ulfat

bujhta hai to hota hai ye dil shoala-fishan aur

apnon hi se tum ishq mein ghabra gae sahab

is rah mein hail hain abhi sang-e-garan aur

duniya mein to mamnua hai jannat mein hai jaez

kya baat hai waiz ki yahan aur wahan aur

hoti hai zaban band to kya kuchh nahin kahti

rukti hai ye talwar to hoti hai rawan aur

asnam-tarashi bhi baDi chiz hai lekin

hai nazuki-e-kargah-e-shisha-garan aur

kahne ko to ai 'arsh' suKHan-sanj hain hum bhi

haq ye hai ki 'ghaalib' ka hai andaz-e-bayan aur