dil un ko diya tha na dil-azar samajh kar

dil un ko diyā thā na dil-āzār samajh kar

ham phañs ga.e dhoke meñ vafādār samajh kar

ḳhurshīd karegā ruḳh idhar bahr-e-tamāshā

mahshar ko tire garmī-e-bāzār samajh kar

ai kabk bahut khā chuke haiñ Thokareñ har gaam

chalnā tū mire yaar kī raftār samajh kar

tārīki-e-marqad se na ghabrātā maiñ lekin

ḳhauf aa gayā furqat kī shab-e-tār samajh kar

vo zār-e-siyah-baḳht huuñ darbānoñ ne us ke

Tokā na mujhe sāya-e-dīvār samajh kar

ye mahv-e-shahādat thā ki be-marzī-e-qātil

abrū pe galā rakh diyā talvār samajh kar

ye be-ḳhud-e-ulfat thā dam-e-sair-e-gulistāñ

shamshād se lipTā qad-e-dildār samajh kar

kuchh roz unheñ sun lījiyo kamsin hai abhī to

ḳhud tark karegā vo bad-atvār samajh kar

ushshāq ko jal marne kī hotī hai tamannā

bijlī ko tirā partav-e-ruḳhsār samajh kar

dekhī mire yūsuf kī jo haiñ garmī-e-bāzār

chup ho ga.e kuchh dil meñ ḳharīdār samajh kar

nāzuk hai bahut vo kahīñ bal koī na paḌ jaa.e

lipTe kamar-e-yār se talvār samajh kar

bulbul kī mohabbat kā 'qalaq' bhed khulā aaj

āshiq hai gul-e-tar pe ye zardār samajh kar

dil un ko diya tha na dil-azar samajh kar

hum phans gae dhoke mein wafadar samajh kar

KHurshid karega ruKH idhar bahr-e-tamasha

mahshar ko tere garmi-e-bazar samajh kar

ai kabk bahut kha chuke hain Thokaren har gam

chalna tu mere yar ki raftar samajh kar

tariki-e-marqad se na ghabraata main lekin

KHauf aa gaya furqat ki shab-e-tar samajh kar

wo zar-e-siyah-baKHt hun darbanon ne us ke

Toka na mujhe saya-e-diwar samajh kar

ye mahw-e-shahadat tha ki be-marzi-e-qatil

abru pe gala rakh diya talwar samajh kar

ye be-KHud-e-ulfat tha dam-e-sair-e-gulistan

shamshad se lipTa qad-e-dildar samajh kar

kuchh roz unhen sun lijiyo kamsin hai abhi to

KHud tark karega wo bad-atwar samajh kar

ushshaq ko jal marne ki hoti hai tamanna

bijli ko tera partaw-e-ruKHsar samajh kar

dekhi mere yusuf ki jo hain garmi-e-bazar

chup ho gae kuchh dil mein KHaridar samajh kar

nazuk hai bahut wo kahin bal koi na paD jae

lipTe kamar-e-yar se talwar samajh kar

bulbul ki mohabbat ka 'qalaq' bhed khula aaj

aashiq hai gul-e-tar pe ye zardar samajh kar