dil wale hain hum rasm-e-wafa humse mili hai

dil vaale haiñ ham rasm-e-vafā ham se milī hai

duniyā meñ mohabbat ko baqā ham se milī hai

vo ḳhanda-ba-lab zikr-e-gulistāñ pe ye bole

ġhunchoñ ko tabassum kī adā ham se milī hai

sadiyoñ se taraste hue kānoñ meñ jo pahuñchī

tārīḳh se pūchho vo sadā ham se milī hai

ham vo haiñ ki ḳhud phūñk diye apne nasheman

gulshan ke añdheroñ ko ziyā ham se milī hai

kyā ek hī mehvar pe hai Thahrī huī duniyā

vo jab bhī milī hai to ḳhafā ham se milī hai

vo but jo ḳhudā aaj bane baiThe haiñ un ko

ye shān-e-ḳhudā.ī ba-ḳhudā ham se milī hai

ham Thahre haiñ tūfān-e-havādis ke muqābil

baḌh baḌh ke gale mauj-e-balā ham se milī hai

sīkhā hai jalāne kā chalan sham.a ne tum se

parvānoñ ko jalne kī adā ham se milī hai

ham ahl-e-mohabbat haiñ lahū dete haiñ 'rāhī'

be-nūr charāġhoñ ko ziyā ham se milī hai

dil wale hain hum rasm-e-wafa hum se mili hai

duniya mein mohabbat ko baqa hum se mili hai

wo KHanda-ba-lab zikr-e-gulistan pe ye bole

ghunchon ko tabassum ki ada hum se mili hai

sadiyon se taraste hue kanon mein jo pahunchi

tariKH se puchho wo sada hum se mili hai

hum wo hain ki KHud phunk diye apne nasheman

gulshan ke andheron ko ziya hum se mili hai

kya ek hi mehwar pe hai Thahri hui duniya

wo jab bhi mili hai to KHafa hum se mili hai

wo but jo KHuda aaj bane baiThe hain un ko

ye shan-e-KHudai ba-KHuda hum se mili hai

hum Thahre hain tufan-e-hawadis ke muqabil

baDh baDh ke gale mauj-e-bala hum se mili hai

sikha hai jalane ka chalan shama ne tum se

parwanon ko jalne ki ada hum se mili hai

hum ahl-e-mohabbat hain lahu dete hain 'rahi'

be-nur charaghon ko ziya hum se mili hai