dil wo jis ke aaine mein aks-e-ainda raha

dil vo jis ke ā.īne meñ aks-e-ā.inda rahā

tiira dāman manziloñ meñ bhī daraḳhshanda rahā

āh-e-āvāra kī sūrat rūh-e-gul pyāsī rahī

phuul ḳhushbū ban ke shabnam ke liye zinda rahā

haa.e vo ik muflis-o-be-ḳhānumā jo umr-bhar

sāya-e-dīvār ahl-e-zar kā bāshinda rahā

kaun ham se chhīn saktā hai mohabbat kā mizāj

pattharoñ meñ rah ke bhī ye naqsh tābinda rahā

zindagī se yuuñ to samjhauta kiyā sab ne magar

jis ne jiine kī qasam khaa.ī vahī zinda rahā

kā.enāt-o-nūr-o-zulmat hai mirā apnā vajūd

raushnī meñ bhī mirā saaya numā.inda rahā

jaane kyā kyā kah gayā us se mirā husn-e-sukūt

der tak vo mere chup rahne pe sharminda rahā

hādse to aur bhī 'tasnīm' se uljhe magar

ik tirā ġham thā jo har aalam meñ pā.inda rahā

dil wo jis ke aaine mein aks-e-ainda raha

tera daman manzilon mein bhi daraKHshanda raha

aah-e-awara ki surat ruh-e-gul pyasi rahi

phul KHushbu ban ke shabnam ke liye zinda raha

hae wo ek muflis-o-be-KHanuma jo umr-bhar

saya-e-diwar ahl-e-zar ka bashinda raha

kaun hum se chhin sakta hai mohabbat ka mizaj

pattharon mein rah ke bhi ye naqsh tabinda raha

zindagi se yun to samjhauta kiya sab ne magar

jis ne jine ki qasam khai wahi zinda raha

kaenat-o-nur-o-zulmat hai mera apna wajud

raushni mein bhi mera saya numainda raha

jaane kya kya kah gaya us se mera husn-e-sukut

der tak wo mere chup rahne pe sharminda raha

hadse to aur bhi 'tasnim' se uljhe magar

ek tera gham tha jo har aalam mein painda raha