dil wo kafir ki sada aish ka saman mange

dil vo kāfir ki sadā aish kā sāmāñ māñge

zaḳhm pā jaa.e to kambaḳht namak-dāñ māñge

lutf aa.e jo koī soḳhta-sāmān-e-bahār

ḳhāliq-e-rañg se phir sho.ala-e-uryāñ māñge

hasrat-e-dīd sar-e-bām tamāsha chāhe

ishq-e-betāb sar-e-tūr charāġhāñ māñge

raat zulfoñ se kare shoḳh añdheroñ kā savāl

raushnī lauh-e-jabīñ se mah-e-tābāñ māñge

ik charāġh aur sar-e-rah-guzar-e-bād sahī

chaar tinkoñ ke liye kaun gulistāñ māñge

kam-nigāhī kā taqāza hai ki phir jur.at-e-shauq

ḳhud tirī shoḳhī-e-andāz se unvāñ māñge

dast-e-vahshat ke koī hausle dekhe 'tābāñ'

jab bhī māñge to usī shoḳh kā dāmāñ māñge

dil wo kafir ki sada aish ka saman mange

zaKHm pa jae to kambaKHt namak-dan mange

lutf aae jo koi soKHta-saman-e-bahaar

KHaliq-e-rang se phir shoala-e-uryan mange

hasrat-e-did sar-e-baam tamasha chahe

ishq-e-betab sar-e-tur charaghan mange

raat zulfon se kare shoKH andheron ka sawal

raushni lauh-e-jabin se mah-e-taban mange

ek charagh aur sar-e-rah-guzar-e-baad sahi

chaar tinkon ke liye kaun gulistan mange

kam-nigahi ka taqaza hai ki phir jurat-e-shauq

KHud teri shoKHi-e-andaz se unwan mange

dast-e-wahshat ke koi hausle dekhe 'taban'

jab bhi mange to usi shoKH ka daman mange