dil yahi soch ke betab hua jata hai

dil yahī soch ke betāb huā jaatā hai

dar-ba-dar merā har ik ḳhvāb huā jaatā hai

rāt-din dard ke āġhosh meñ jaltī sāñseñ

ab lahū jism kā tezāb huā jaatā hai

bahte rahte haiñ in āñkhoñ se musalsal aañsū

shahr-e-dil vādī-e-be-āb huā jaatā hai

jab bhī paḌtī hai khulī dhuup zamīñ par us kī

us kā chehra koī mahtāb huā jaatā hai

terī yādoñ kī mahak aur ye halkī rim-jhim

aaj bistar bhī to kam-ḳhvāb huā jaatā hai

jaane kyā baat hai jo aap kī qurbat pā kar

aam insān bhī nāyāb huā jaatā hai

bazm meñ aap ke aane kī khabar sun sun kar

dil merā ḳhitta-e-shādāb huā jaatā hai

kyā karūñ ab maiñ zamāne se mohabbat kar ke

ye samundar bhī to pāyāb huā jaatā hai

kyā kahūñ aa.e dinoñ gaañv merā fashion meñ

kabhī dillī kabhī punjab huā jaatā hai

dil yahi soch ke betab hua jata hai

dar-ba-dar mera har ek KHwab hua jata hai

raat-din dard ke aaghosh mein jalti sansen

ab lahu jism ka tezab hua jata hai

bahte rahte hain in aankhon se musalsal aansu

shahr-e-dil wadi-e-be-ab hua jata hai

jab bhi paDti hai khuli dhup zamin par us ki

us ka chehra koi mahtab hua jata hai

teri yaadon ki mahak aur ye halki rim-jhim

aaj bistar bhi to kam-KHwab hua jata hai

jaane kya baat hai jo aap ki qurbat pa kar

aam insan bhi nayab hua jata hai

bazm mein aap ke aane ki khabar sun sun kar

dil mera KHitta-e-shadab hua jata hai

kya karun ab main zamane se mohabbat kar ke

ye samundar bhi to payab hua jata hai

kya kahun aae dinon ganw mera fashion mein

kabhi dilli kabhi punjab hua jata hai