dil zaban zehn mere aaj sanwarna chahen

dil zabāñ zehn mire aaj sañvarnā chāheñ

sab ke sab sirf tirī baat hī karnā chāheñ

daaġh haiñ ham tire dāman ke so ziddī bhī haiñ

ham koī rañg nahīñ haiñ ki utarnā chāheñ

aarzū hai hameñ sahrā kī so haiñ bhī sairāb

ḳhushk ho jaa.eñ ham ik pal meñ jo jharnā chāheñ

ye badan hai tirā ye aam sā rasta to nahīñ

is ke har moḌ pe ham sadiyoñ Thaharnā chāheñ

ye sahar hai to bhalā chāhiye kis ko ye ki ham

shab kī dīvār se sar phoḌ ke marnā chāheñ

jaise so.e hue paanī meñ utartā hai saañp

ham bhī chup-chāp tire dil meñ utarnā chāheñ

aam se shaḳhs ke lagte haiñ yuuñ to tere paañv

saare dariyā hī jinheñ chhū ke guzarnā chāheñ

chāhte haiñ ki kabhī zikr hamārā vo kareñ

ham bhī bahte hue paanī pe Thaharnā chāheñ

naam aayā hai tirā jab se gunahgāroñ meñ

sab gavāh apnī gavāhī se mukarnā chāheñ

vasl aur hijr ke dariyā meñ vahī utreñ jo

is taraf Duub ke us or ubharnā chāheñ

koī aa.egā nahīñ TukḌe hamāre chunñe

ham isī jism ke andar hī bikharnā chāheñ

dil zaban zehn mere aaj sanwarna chahen

sab ke sab sirf teri baat hi karna chahen

dagh hain hum tere daman ke so ziddi bhi hain

hum koi rang nahin hain ki utarna chahen

aarzu hai hamein sahra ki so hain bhi sairab

KHushk ho jaen hum ek pal mein jo jharna chahen

ye badan hai tera ye aam sa rasta to nahin

is ke har moD pe hum sadiyon Thaharna chahen

ye sahar hai to bhala chahiye kis ko ye ki hum

shab ki diwar se sar phoD ke marna chahen

jaise soe hue pani mein utarta hai sanp

hum bhi chup-chap tere dil mein utarna chahen

aam se shaKHs ke lagte hain yun to tere panw

sare dariya hi jinhen chhu ke guzarna chahen

chahte hain ki kabhi zikr hamara wo karen

hum bhi bahte hue pani pe Thaharna chahen

nam aaya hai tera jab se gunahgaron mein

sab gawah apni gawahi se mukarna chahen

wasl aur hijr ke dariya mein wahi utren jo

is taraf Dub ke us or ubharna chahen

koi aaega nahin TukDe hamare chunne

hum isi jism ke andar hi bikharna chahen