dila mashuq jo hota hai wo saffak hota hai

dilā ma.ashūq jo hotā hai vo saffāk hotā hai

baḌā be-rahm hotā hai baḌā bebāk hotā hai

ḳhushī hogī halāk apnā dil-e-sad-chāk hotā hai

kahāñ ab aarzū ghar hasratoñ kā ḳhaak hotā hai

tumhārī teġh mujh se chupke chupke kahtī jaatī hai

mubārak ho ki ye sar zīnat-e-fitrāk hotā hai

tujhe allāh ne baḳhshā hai kaisā rutba-e-ālī

ki terā naqsh-e-pā tāj-e-sar-e-aflāk hotā hai

qarīb aayā hai vaqt ai jān-e-jāñ ab dam nikalne kā

tire kūche se ham uThte haiñ jhagḌā paak hotā hai

jo piite haiñ sharāb un kī mohabbat meñ nahīñ aasī

ye tar-dāman vahī haiñ jin kā dāman paak hotā hai

ḳhayāl aatā hai badnāmī kā āshiq qatl hote haiñ

ki māshūqoñ ko nām-e-āshiqī se paak hotā hai

asar se merī vahshat ke koī jaama nahīñ sābit

maiñ suntā huuñ garebāñ har kafan kā chaak hotā hai

maiñ kah detā huuñ ho aa kar zulf ke kūche meñ dam-bhar ko

kisī din jab bahut muztar dil-e-ġhamnāk hotā hai

pahuñch jaa.e haqīqat tak tirī ye ġhair-mumkin hai

bahut go tujh se vāqif sāhab-e-idrāk hotā hai

'rashīd'-e-zār kyuuñ ḳhush ḳhush na jaa.e qabr kī jānib

mayassar aaj dīdār-e-shah-e-laulāk hotā hai

dila mashuq jo hota hai wo saffak hota hai

baDa be-rahm hota hai baDa bebak hota hai

KHushi hogi halak apna dil-e-sad-chaak hota hai

kahan ab aarzu ghar hasraton ka KHak hota hai

tumhaari tegh mujh se chupke chupke kahti jati hai

mubarak ho ki ye sar zinat-e-fitrak hota hai

tujhe allah ne baKHsha hai kaisa rutba-e-ali

ki tera naqsh-e-pa taj-e-sar-e-aflak hota hai

qarib aaya hai waqt ai jaan-e-jaan ab dam nikalne ka

tere kuche se hum uThte hain jhagDa pak hota hai

jo pite hain sharab un ki mohabbat mein nahin aasi

ye tar-daman wahi hain jin ka daman pak hota hai

KHayal aata hai badnami ka aashiq qatl hote hain

ki mashuqon ko nam-e-ashiqi se pak hota hai

asar se meri wahshat ke koi jama nahin sabit

main sunta hun gareban har kafan ka chaak hota hai

main kah deta hun ho aa kar zulf ke kuche mein dam-bhar ko

kisi din jab bahut muztar dil-e-ghamnak hota hai

pahunch jae haqiqat tak teri ye ghair-mumkin hai

bahut go tujh se waqif sahab-e-idrak hota hai

'rashid'-e-zar kyun KHush KHush na jae qabr ki jaanib

mayassar aaj didar-e-shah-e-laulak hota hai