dila na apni mohabbat ka etibar mujhe

dilā na apnī mohabbat kā e'tibār mujhe

ḳhudā ke vāste rahne de sogvār mujhe

nahīñ hai manzar-e-hastī pe e'tibār mujhe

mashiyyatoñ ne diyā hai dil-e-figār mujhe

har ik maqām pe shākī hai aadmī kī nazar

na raas aayā tajassus kā kārobār mujhe

firāq-e-dost kā ġham ho ki ho nashāt-e-hayāt

nahīñ hai ab kisī hālat pe e'tibār mujhe

nigāh-e-shauq ko kyoñ zahmat-e-takallum duuñ

ḳhizāñ kā rang hai pairāhan-e-bahār mujhe

ḳhulūs-e-ishq kī tauhīn hai navā-e-alam

fuġhān-e-shauq na kar aur sharmsār mujhe

junūn-e-ishq kī nairangiyāñ ma.āz-allāh

kiyā bahār meñ āzurda-e-bahār mujhe

dila na apni mohabbat ka e'tibar mujhe

KHuda ke waste rahne de sogwar mujhe

nahin hai manzar-e-hasti pe e'tibar mujhe

mashiyyaton ne diya hai dil-e-figar mujhe

har ek maqam pe shaki hai aadmi ki nazar

na ras aaya tajassus ka karobar mujhe

firaq-e-dost ka gham ho ki ho nashat-e-hayat

nahin hai ab kisi haalat pe e'tibar mujhe

nigah-e-shauq ko kyon zahmat-e-takallum dun

KHizan ka rang hai pairahan-e-bahaar mujhe

KHulus-e-ishq ki tauhin hai nawa-e-alam

fughan-e-shauq na kar aur sharmsar mujhe

junun-e-ishq ki nairangiyan maaz-allah

kiya bahaar mein aazurda-e-bahaar mujhe