dila ye mai-kada-e-ishq hai sharab tu pi

dilā ye mai-kada-e-ishq hai sharāb tū pī

sharāb agar nahīñ ḳhūn-e-dil-e-ḳharāb tū pī

bahe jo dhaar dam-e-teġh se na jā pyāsā

sabīl-e-nazr-e-shahīdāñ yahī hai aab tū pī

ba-rañg-e-shabnam-e-gul dāġh-e-ishq se dil par

jo gul na khaa.e to be-ḳhud na ho gulāb tū pī

na āftāb-e-qayāmat se Dar mai-e-gul-rañg

kare chaman meñ agar sair māhtāb tū pī

valā ye jām-e-mai-e-nāb barq-o-bārāñ meñ

jo jām-e-jam se hai maanā ba-āb-o-tāb tū pī

sharāb jauhar-e-ātish hai aql hai sīmāb

ye le uḌe hai agar us kī laa.e taab tū pī

rasīd-e-qatra ba-dariyā hai mai se bhar bhar ke

surāhī-e-guhar-o-kāsa-e-habāb tū pī

naqāb muñh se uThā āftāb abr meñ hai

miyāñ piyāla jo piinā hai be-hijāb tū pī

hai abr-e-sāya-e-rahmat gunāhgāroñ par

piyāla ho.e agar rash.ha-e-sahāb tū pī

jigar jale to na girne de aañkh se aañsū

ba-az-sharāb ye ḳhūñ-nāba-e-kabāb tū pī

rahegā mast tah-e-ḳhāk daur-e-mahshar tak

'muhib' man-e-mai-e-ishq-e-abū-turāb tū pī

dila ye mai-kada-e-ishq hai sharab tu pi

sharab agar nahin KHun-e-dil-e-KHarab tu pi

bahe jo dhaar dam-e-tegh se na ja pyasa

sabil-e-nazr-e-shahidan yahi hai aab tu pi

ba-rang-e-shabnam-e-gul dagh-e-ishq se dil par

jo gul na khae to be-KHud na ho gulab tu pi

na aaftab-e-qayamat se Dar mai-e-gul-rang

kare chaman mein agar sair mahtab tu pi

wala ye jam-e-mai-e-nab barq-o-baran mein

jo jam-e-jam se hai mana ba-ab-o-tab tu pi

sharab jauhar-e-atish hai aql hai simab

ye le uDe hai agar us ki lae tab tu pi

rasid-e-qatra ba-dariya hai mai se bhar bhar ke

surahi-e-guhar-o-kasa-e-habab tu pi

naqab munh se uTha aaftab abr mein hai

miyan piyala jo pina hai be-hijab tu pi

hai abr-e-saya-e-rahmat gunahgaron par

piyala hoe agar rashha-e-sahab tu pi

jigar jale to na girne de aankh se aansu

ba-az-sharab ye KHun-naba-e-kabab tu pi

rahega mast tah-e-KHak daur-e-mahshar tak

'muhib' man-e-mai-e-ishq-e-abu-turab tu pi