dilkashi nam ko bhi aalam-e-imkan mein nahin

dilkashī naam ko bhī ālam-e-imkāñ meñ nahīñ

apne matlab kā koī phuul gulistāñ meñ nahīñ

va.ada-e-vasl pe khiñchtā huā haañ kā lahja

ek andāz hai kahne kā tire haañ meñ nahīñ

aap kahte haiñ ki taqdīr kī gardish meñ rahe

māntā huuñ ki ye dil gesu-e-pechāñ meñ nahīñ

bas kisī kā nahīñ sayyād ḳhatā kyā terī

āb-o-dāna mirī qismat kā gulistāñ meñ nahīñ

ḳhaak hone se banā chashm-e-falak kā surma

ḳhāksārī jo nahīñ ḳhaak bhī insāñ meñ nahīñ

naqsh-e-tauhīd hai har naqsh-e-jabīn-e-sajda

kahīñ ka.abe kā to patthar dar-e-jānāñ meñ nahīñ

pahle hī lauT thā parvāna tirī mahfil par

ab ye sunte haiñ ki bulbul bhī gulistāñ meñ nahīñ

pāk-bāzī kī taraf jab se jhuke haiñ 'kaifī'

bāda-noshī kā mazā mahfil-e-rindāñ meñ nahīñ

dilkashi nam ko bhi aalam-e-imkan mein nahin

apne matlab ka koi phul gulistan mein nahin

wada-e-wasl pe khinchta hua han ka lahja

ek andaz hai kahne ka tere han mein nahin

aap kahte hain ki taqdir ki gardish mein rahe

manta hun ki ye dil gesu-e-pechan mein nahin

bas kisi ka nahin sayyaad KHata kya teri

aab-o-dana meri qismat ka gulistan mein nahin

KHak hone se bana chashm-e-falak ka surma

KHaksari jo nahin KHak bhi insan mein nahin

naqsh-e-tauhid hai har naqsh-e-jabin-e-sajda

kahin kabe ka to patthar dar-e-jaanan mein nahin

pahle hi lauT tha parwana teri mahfil par

ab ye sunte hain ki bulbul bhi gulistan mein nahin

pak-bazi ki taraf jab se jhuke hain 'kaifi'

baada-noshi ka maza mahfil-e-rindan mein nahin