dilon ka soz tere ru-e-be-naqab ki aanch

diloñ kā soz tire rū-e-be-naqāb kī aañch

tamām garmī-e-mahfil tire shabāb kī aañch

savāb-e-ḳhuld-e-barīñ kyā azāb-e-dozaḳh kyā

tire ḳhitāb kī ThanDak tire itaab kī aañch

harīm-e-ishq ke pardoñ se lau nikaltī hai

ye soz-o-sāz hai kis naġhma-e-rabāb kī aañch

lahakte sabze meñ abr-e-bahār kī mastī

dahakte phuul meñ chhalkī huī sharāb kī aañch

ye kaif-e-husn ye barq-e-nigāh kyā kahnā

lagā de aag na us dāman-e-sahāb kī aañch

chaḌhā ke sāġhar-e-mai jagmagā uThe chehre

simaT ke aa ga.ī sīnoñ meñ āftāb kī aañch

panāh maañg rahī hai harī-bharī duniyā

na pūchh āh-dil-e-ḳhā-numāñ-ḳharāb kī aañch

ye agle vaqtoñ ke haiñ ḳhush haiñ bāġh-e-jannat meñ

unheñ ḳhabar hī nahīñ kyā hai is savāb kī aañch

ye aa gayā hai yahāñ kaun kāfir-e-ma.asūm

ki ThanDī paḌ ga.ī dozaḳh ke bhī azaab kī aañch

jise samajhte haiñ sab mauj-e-kausar-o-tasnīm

vo aa.ina bhī hai tapte hue sarāb kī aañch

sahar kī tāza-damī chaḌhtī dhuup kī garmī

tirī nigāh kī ThanDak tire shabāb kī aañch

rukī rukī sī lab-e-shauq par hai arz-e-visāl

ki phūñk de na tire zauq-e-intiḳhāb kī aañch

yahī hai raunaq-e-garmī yahī hai raunaq-e-bazm

nigāh-e-nāz tire zauq-e-intiḳhāb kī aañch

ye raat aag lagā de kahīñ na duniyā meñ

ye chāñdnī ye havā.eñ ye māhtāb kī aañch

shuā.eñ phuuT ke jaise fazā meñ gum ho jaa.eñ

chhalakte jaam meñ ye chashmak-e-habāb kī aañch

savār-e-ablaq-e-ayyām mausam-e-gul hai

chaman ke sho.ale haiñ yā halqa-e-rikāb kī aañch

ye mehr-o-māh bhī uḌte hue sharāre haiñ

ki arsh tak hai mohabbat ke pech-o-tāb kī aañch

sameT rakkhe haiñ rūhul-qudus ne par apne

pahuñch rahī hai kahāñ tak is iztirāb kī aañch

'firāq' vaqt ke ruḳh se ulaT rahī hai naqāb

zamīñ se tā-ba-falak hai is inqalāb kī aañch

dilon ka soz tere ru-e-be-naqab ki aanch

tamam garmi-e-mahfil tere shabab ki aanch

sawab-e-KHuld-e-barin kya azab-e-dozaKH kya

tere KHitab ki ThanDak tere itab ki aanch

harim-e-ishq ke pardon se lau nikalti hai

ye soz-o-saz hai kis naghma-e-rabab ki aanch

lahakte sabze mein abr-e-bahaar ki masti

dahakte phul mein chhalki hui sharab ki aanch

ye kaif-e-husn ye barq-e-nigah kya kahna

laga de aag na us daman-e-sahab ki aanch

chaDha ke saghar-e-mai jagmaga uThe chehre

simaT ke aa gai sinon mein aaftab ki aanch

panah mang rahi hai hari-bhari duniya

na puchh aah-dil-e-KHa-numan-KHarab ki aanch

ye agle waqton ke hain KHush hain bagh-e-jannat mein

unhen KHabar hi nahin kya hai is sawab ki aanch

ye aa gaya hai yahan kaun kafir-e-masum

ki ThanDi paD gai dozaKH ke bhi azab ki aanch

jise samajhte hain sab mauj-e-kausar-o-tasnim

wo aaina bhi hai tapte hue sarab ki aanch

sahar ki taza-dami chaDhti dhup ki garmi

teri nigah ki ThanDak tere shabab ki aanch

ruki ruki si lab-e-shauq par hai arz-e-visal

ki phunk de na tere zauq-e-intiKHab ki aanch

yahi hai raunaq-e-garmi yahi hai raunaq-e-bazm

nigah-e-naz tere zauq-e-intiKHab ki aanch

ye raat aag laga de kahin na duniya mein

ye chandni ye hawaen ye mahtab ki aanch

shuaen phuT ke jaise faza mein gum ho jaen

chhalakte jam mein ye chashmak-e-habab ki aanch

sawar-e-ablaq-e-ayyam mausam-e-gul hai

chaman ke shoale hain ya halqa-e-rikab ki aanch

ye mehr-o-mah bhi uDte hue sharare hain

ki arsh tak hai mohabbat ke pech-o-tab ki aanch

sameT rakkhe hain ruhul-qudus ne par apne

pahunch rahi hai kahan tak is iztirab ki aanch

'firaq' waqt ke ruKH se ulaT rahi hai naqab

zamin se ta-ba-falak hai is inqalab ki aanch