dilon ke darmiyan jis waqt ye zamana paDa

diloñ ke darmiyāñ jis vaqt ye zamānā paḌā

dayār-e-ishq se bāhar nikal ke aanā paḌā

kisī ko haq thā jahāñ chāhe rāstā badle

kisī ko umr talak rābta nibhānā paḌā

pasīna ham ne bahāyā na jang se pahle

tabhī to ham ko lahū jang meñ bahānā paḌā

koī samajhtā mire dil kī kaifiyat us pal

tumhārā aks rah-e-dil se jab miTānā paḌā

kise ḳhabar ki sukūñ kī talāsh meñ ham ko

hayāt-e-fānī meñ kitnoñ se dil lagānā paḌā

dilon ke darmiyan jis waqt ye zamana paDa

dayar-e-ishq se bahar nikal ke aana paDa

kisi ko haq tha jahan chahe rasta badle

kisi ko umr talak rabta nibhana paDa

pasina hum ne bahaya na jang se pahle

tabhi to hum ko lahu jang mein bahana paDa

koi samajhta mere dil ki kaifiyat us pal

tumhaara aks rah-e-dil se jab miTana paDa

kise KHabar ki sukun ki talash mein hum ko

hayat-e-fani mein kitnon se dil lagana paDa